Luk 14 | BEF | STEP | Mone yupahi fuli kanagu Yesu sipi bo Felosimofihi hepato buto nose'na nalube'mu nohigo asaga bona'i ana nonuga minana Yesuhi mapahi fi'ahana.

Luke 14

Bo mone gufa'a hofa notana Yesu le'mo bati hu'ehina

1 Mone yupahi fuli kanagu Yesu sipi bo Felosimofihi hepato buto nose'na nalube'mu nohigo asaga bona'i ana nonuga minana Yesuhi mapahi fi'ahana. 2 Bo mone gi yahi hofa tago nominana bo Yesu nohina nonuga ti'ehina. 3 Keya ka lu epise bo to Felosi bomagihi Yesu ma luto enoloka ho'ehina: Mono fuli kanagu bati huto bona'i enele'mo bati hilina ni'ifi ya hilina meni'ibe? 4 Ya ligo ana bona'i enali kaga mone meli'ahana. Yesu ana bo gufa'a le'mo bati huloto he'mi etago bu'ehina. 5 Ya huloto ma luto lu epi'ehina: To bo mone lenali folagahatiniguti pana'afi to bulumaka mone'afi fuli kanalo kelimogu limilina ana bouba buto fuli kana ni'ibe luto mele'isi le'mo saga mehilina ni'ifihe? 6 To enali ana bona'magi Yesu enoloka hana ka'alo nona'a lu emilana bati mehi'ahana yabe.

Bona'i enele'mo bati huse'na

7 Asaga bona'i ana nonugati ete nose'na nalune'mu ana bona'i enali yata'a siatoko minalune'mu hago Yesu bu enogoto bame ka mone ma luto lu epi'ehina: 8 Mone yupahi ana gukete hite sipi nose'na nalune'mu kehe neinogomo lenali hetofa hepa'i lite minelata mehilo. Kibina bo mone'mofihi ana gukete nose'nalo kehe i'ehilana'mu lenali ai hepa'a li lalabe. 9 Lenali ya hi'ehinogomo ana sipi nose'na nogoto lenali kehe ilina bouba ma luto lu lepilina'mu yabe: Lenali ya'ma hetofa sia'i ma bomofihi emilo. Ya linogo lenalitoga sipi lenubuya hinogo asaga bona enemegesaga melugu bite minalana'mu yabe. 10 Ya hu'ehinagi lenali bo moneuba ana gukete huloto sipi nose'na nogoto lenali'i kehe noinogomo lenali kasitoga bite melugu minalo. Ya nehinogo nohi afo'afu ma luto lilina'mu yabe: Nalalu'niga, kai malo oto sia'i hetofa'alo minobo. Ya linogo asaga bona enubugu kegelo bito minalata'mu yabe. 11 To bo moneuba ti saga huto nohuto gi'a li saga hilina Hu'mau le'mo laba huto le'mo lagaso bo lolo nohuto to, bo mone laba huto minoto agoya bo minalina Hu'mau sipi bo le'mo lolo hilina'mu yabe luto Yesu lu'ehina yabe.

12 To ana nose'na laita hinalo kehe igo ana bona'i Yesu ma luto lu emi'ehina: Kai fuligaha nose'nafi to utehe nose'na epilube'mu nohanemo kalalukagihifi to kai kalamehakafi to yogo fe'noha'ani babu lina bona'i enaligo kehe ilata mehubo. Hena'mube? Enali alihi ana hite nose'na go noeputa nona'a gete kimilina'mu yabe. 13 To kai nose'na goto nalube'mu nohanemo musufalo bona'ifi gi yahi fili'ehina bona'ifi enigigusa sibina hu'ehina bona'ifi to enubu pisi lu'ehina bona'i ya'ma kehe ito nose'na efahi goloto epito nalo lu epilane. 14 Enali ya'mana bona'magi nose'naka nona'a gete mekimilinaya kai alihi kegelo bilana'mu yabe. Hena'mu kegelo bilabe? Alihi Hu'mau bulo bona'i bati hite mine fili'ahana to ti su nehenogo Hu'mau ana nose'nakalo mina'a kimiloto pa salina'mu yabe, luto Yesu lu epi'ehina yabe.

Sipi nose'na laita hu epolo'ehina bame ka'a

Mt 22:1-10

15 To ana nose'nalo gehesa hi'ahanamagi moneuba kehelito Yesuhi ka'alo alu emi'ehina: Hu'mamofihi Kapo'alugu nose'na nalune'mu nehite li gehesa hilanamagi enofokehi lilanamo ni'ibe. 16 Ya lu'ehigo Yesu ma luto bame ka lu emi'ehina: Bo moneuba sipi nose'na laita hilube'mu nohuto yege yege bona'mo elesa molo'ehina. 17 To laita nohina yupapogu kele kele pana'a ho lifigo, buto kehe i'ehina: Alo. Alo. luto, nose'na li nupa hunogo nalanagi alo, luto lu epigo, enali asaga'i: 18 O'e. Mebilune, ai ya ligo ai ya ligo enipa'ani nehite soya ka ana kele kele pana'amofihi lu emite fato fato ka lu emi'ahabe. Mone: Ke. Me'mo mone yuhufasi mina fi'ohunagi ya'ma buto bu galube'mu nohube, luto lu emi'ehibe. 19 To mone: Ke. Bulumaka yagamo nayahi luga luga su hago yuhufasi mina fi'ohuna yabe. Foya'nigu me'mo kifise'na kefefe hite me'i lilabe luto mina fi'ohunagi buto babeyafa hilube'mu nohube, luto lu emi'ehibe. 20 To mone: Ke. A'i yuhufasi kata hu'ohunagi ya'mu mebilube'mu nohube, luto lu emi'ehibe. 21 Ya lite lago, kele kele pana'mo i behe huto buto afo'afihi ya'ma kaga'ani asaga'na lu emigo, ai ipaluga logo bigo lu'ehina: Kai me'me huto buto hepatoga buto lagaso hepa'mo hiti sipi hepa'mo hiti sa sa hutoka fato bona'mo enelemoto obo. Kene'i nehana bona'i hiti enayahi sibina hu'ehina bona'i hiti enubu pisi lu'ehina bona'i hiti to enigigusa sibina hu'ehina bona'i hiti sa sa huto enele'moto obo, luto lu emi'ehina. 22 To ya ligo kele kele pana'a buto ana huloto oto: Afo'niga, ya'ma lu nimi'ahatana to hepa'i keleko mone'i hibe, luto lu emigo 23 afo'afu ma luto lu emi'ehina: Kai aku'i buto olopa me kapolo hiti to kifigu hiti analo'i sa sa huloto malo'i enele'mo kefefe huto hepa'ni le'mo kikipa halabe luto enele'moto obo. 24 To ka'ni mone lu nokumuna keheli'ohubo. Enali yata'a elesa molo'ohunamofihi bona'magi enogomo meepilunagihe. Nose'na'ni menalabe luto noluna yabe. Yesu ya lu'ehina bame ka yabe.

Bo ai ekesa yigi bati huloto Yesuhi mege'i meleno

Mt 10:37-38

25 Babu boana'i Yesuhi mege'i lifite nebago Yesu i behe huto ma luto ana boana'i lu epi'ehina: 26 Bo moneuba nanitoga o'ehilinaya ai ito'agi afo'agi etali'agi to gonamu tamu'a to ai'a meha'amofi gufa'amofi ya'ma enalito megesa hu meepi'ehilina ai ana bouba nani koko pana'ni lolo mehilina'mu. To ana huto ai'a gufa'a laga besilina bona'i nani koko pana'ni lolo mehilina'mu. 27 To bo moneuba ai malipu yafa'a kofiloto nani'i nemege'i memalalina nani koko pana'ni lolo mehilina'mu yabe. 28 To bo mone lenali folagahatiniguti ai yatama yatama nohi gilago tilube lutomo ai yata'a ana noto mina'a he'milina'amu melugu minoto yaki'a he'mito ana nohi gilunagi luto ekesa yigi bati hulata nohibe. Ai ekesa yigiloto henaki'a efatu'i ana nohi gi baga ilufi luto kehelilata nohibe. 29 To ai ekesa yigi bati mehuse hagulu hagulu tito ana nohi kefa hisa lolo huto mololoto efahi su nohenogomo he'mi'ehigo kifi noligigo bila ela nehana bona'magi ana bomofihi kiya'a hi eteme bila ela hilata nehabe. 30 Ya nehite ma lite ana bona'magi lilata nehabe: Ma bouba nohi gilufi luto gi hapi finaya ana nohi gi baga meibe lite lilata nehabe. 31 To gihiti bo moneuba fato gihiti bo hiti luba hilu'ibe luto bilube'mu nohutomo ai minoto ma luto ekesa yigi bati huto ma luto nolibe. Nani gimi bo'ni 10 tauseni enele'moto nobinogo'nimo ai fato gihiti bouba 20 tauseni gimi bo'a hiti enele'moto alina'mu keheli bati huloto ma luto lulata nohibe. Ai ya'mana 20 tauseni gimi bo'a nehana gihiti bouba nani'i nohoto nele'mo he'milifi luto yata'a ekesa yigi bati hulata nohibe. 32 To ai gimi bo'a babu lite menehagomo ai amuya molo fato gihiti bo haluna'a huto menohube luloto'a fateha'a foto'i nohigo luba mehilu'ina aku'i fulu hilu'ibe luto kaga leli'ali bolo kaga he'mi etago bulata nohibe. 33 Yesu ana kaga'a lu baga i'ehina: Ana suhi huto mone bomaka asaga yogo fe'nohaka kemegesa hu emiloto ya suhi meminalata nani koko pana'ni lolo mehilata'mu yabe lu'ehina yabe.

Amuya'a menina hege

Mt 5:13; Mk 9:50

34 Hegemoya bati'na ni'ina'mu to lenali hegemo legitana nehabe. To hege laga'a fenene hilina aku'i enali hena hinogo hege bati huto laga'a hilina ni'ibe? 35 Ya'iya hina hege foyagu tili hilana foya le'mo bati mehilina'mu yabe. To yagamagihi si'ani hiti li nupa mehilata nehabe. Fa'mene li he'milata nehabe. Lenali yalo kehelilo, lenali lenekesa ni'inogomo keheli bati hite kehelilo, luto Yesu lu epi'ehina yabe.